Siglir tar il cuntegn

Svizra Svizzers pajan anc adina dapli per medicaments

Generica custa en Svizra anc adina dubel uschè bler. Medicaments originals èn 9 fin 17% pli chars ch'en l'exteriur.

Differentas stgatlas da medicaments.
Legenda: Generica custa en Svizra anc adina dubel uschè bler sco en l'exteriur. Keystone

En Svizra custa generica anc adina duas giadas uschè bler sco en l’exteriur. Preparats originals custan qua 9 fin 17% dapli ch'èn 9 pajas europeics cumparegliads. Quai han Santésuisse ed Interpharma declerà ad ina conferenza da medias communabla.

En media 800 francs per medicaments ad onn

Per onn e per persuna dettian ins ora en Svizra en media 800 francs per medicaments, ha constatà Verena Nold, la directura da l'associaziun da cassas da malsauns Santésuisse, davant las medias. I dettia in cler consens ch'ils custs da sanadad stoppian vegnir sbassads. En general ha ella pretendì in'adattaziun da tut ils pretschs da medicaments e betg mo dad in terz dal sortiment. Cun questa mesira fissi tenor Nold pussaivel da spargnar 100 milliuns francs per onn.

Interpharma sa dosta

Per Interpharma, l'asscociaziun d'interess da las interpresas da farma, giess quai dentant memia lunsch. Grazia a la runda da reducir pretschs dal 2017 na dettia tar ils medicaments patentads quasi nagina differenza pli dals pretschs reals, ha argumentà René Buholzer, il manader da fatschenta dad Interpharma. Per reducir ils custs da sanadad haja l'industria farmaceutica spargnà 300 milliuns francs. Quai sajan respargns che fetschian mal a la branscha.

RR novitads 12:00