Glindesdi saira è stada la surdada dal premi d'art per Jürg Conzett da Tumein e Gianfranco Bronzini da Panaduz a Basilea. Els han survegnì il «Grond Premi Art / Prix Meret Oppenheim 2022» da l'Uffizi federal per cultura.
Conzett e Bronzini demussian che l'art d’inschigner saja adina er ina part da la cultura da construcziun. Lur finamira saja tar mintga project che l'intervenziun en la cuntrada u la citad saja commensurada – e quai ord vista constructiva, economica ed estetica.
Ils dus inschigners e construiders da punts lavuran dapi il 1994 ensemen. Dapi il 1996 han els in biro communabel a Cuira. Els èn activs sin l’entir mund. En il Grischun è in da lur numerus projects la Punt da Suransuns en la Viamala.
Sper Jürg Conzett e Gianfranco Bronzini han er las artistas Caroline Bachmann e Klodin Erb survegnì in premi da l'Uffizi federal da cultura.
Ord l'archiv: Ulteriuras ovras e reportaschas