Svizra - Swiss Life vul pajar ora dapli da ses gudogn
Swiss Life, l'assicurader da vita svizzer, fa quint da pajar a ses acziunaris dividendas pli autas. En futur duain 30-50% dal gudogn vegnir pajads ora, communitgescha il concern ad in'occurrenza per ils investiders. Quest onn ha el pajà 25%.
Per quest onn da gestiun fa Swiss Life quint da pajar 8 francs dividenda per mintga aczia.
Spargnar 100 milliuns francs
Sper quest plan vul l'assicuranza dentant er spargnar enfin il 2018 100 milliuns francs, quai scriva il concern. Sche quai grategia ha l'interpresa spargnà dal 2008 fin il 2018 en total passa 600 milliuns francs. Sper spargnar quinta Swiss Life dentant er d'investir, en spezial per sviluppar enavant il nov model da fatschenta.
