Siglir tar il cuntegn

Header

cuntegn

Swiss Re / Sulzer Cifras da fatschenta: Assicuranzas top, industria flop

En l’emprim quartal da l’onn current ha il concern da reassicuranza Swiss Re pers ina massa daners. Cun far in grond gudogn durant il segund quartal, è il segund grond reassicurader dal mund turnà en las cifras nairas. Il prim mez onn resulteschia in gudogn da 157 milliuns dollars, sco l’interpresa ha communitgà il venderdi. La schletta entschatta da l'onn da fatschenta hajan principalmain chaschunà las reservas ch’il concern haja fatg en vista a la guerra en l’Ucraina. In'autra raschun saja stada pli bass resultats da las investiziuns. Durant il medem temp l’onn passà aveva la Swiss Re anc fatg in gudogn dad 1 milliarda dollars.

Sulzer cun cifras cotschnas

Il concern d’industria svizzer ha fatg ina perdita da 48,8 milliuns francs ils emprims sis mais dal 2022. La svieuta saja dentant creschida per 1,5 pertschient – sin 1,52 milliardas francs. Patì haja la svieuta dals lockdowns en la China. Vitiers vegnia che la fatschenta en Russia ed en Pologna saja dada davent.

Vis sur tut mantegna la direcziun las prognosas per l’entir onn 2022, cun laschar davent ils effects negativs che resultan cun bandunar il martgà russ. Uschia quinta Sulzer da crescher ord atgna forza per 2 fin 4 pertschient – e las empustaziuns duain crescher tranter 3 e 5 pertschient, hai num en la communicaziun.

audio
Per tadlar: Las novitads da las 11:00
ord RTR Audio dals 29.07.2022.
laschar ir. Durada: 3 minutas 41 Secundas.

 

RTR novitads 11:00

Artitgels legids il pli savens