Per cas d’ina mancanza d’energia l’enviern pudess la Swisscom tegnair sidretg sias purschidas cun agid da generaturs da diesel per radund 72 uras. Quai ha ditg il schef dal concern da telecommunicaziun Christoph Aeschlimann envers la gasetta “Le Temps”.
Interrupziuns pli lungas er in problem per la rait mobila
Pertutgant la rait mobila sajan las radund 6'000 antennas da Swisscom bain equipadas cun battarias d’urgenza che funcziunian tranter ina e pliras uras, sch’i na dettia nagina forza electrica. Dentant fissan interrupziuns dal current pli lungas er in problem per la rait mobila. El na possia dentant betg s’imaginar ch’ina entira citad vegnia prendida da la rait electrica en ina. I sa tractia plitost da tscherts quartiers, uschia che las antennas funcziunian er vinavant alternativamain.