Siglir tar il cuntegn

Svizra Swisscom – chasti da 71,8 milliuns francs

Tenor la cumissiun da concurrenza CumCo haja la Swisscom malduvrà – ensemen cun sias societads affiliadas CT Cinetrade SA e la Teleclub SA - sia posiziun da monopol tar l’emissiun live da differentas occurrenzas da sport en il Pay-TV.

Sumbrivas sa muentan da maniera agittada davant in logo da la Swisscom.
Legenda: Discussiuns tar ils dretgs dad emetter sport - la Swisscom survegn in chasti da 71,8 milliuns francs. Keystone

Concret sa tracta quai da gieus dal campiunadi svizzer da ballape e da hockey, ma era da tscherts gieus da ballape en l’exteriur.

In telecummond cun Plirs Pay-TV-apps lasura.
Legenda: Malduvrà il monopol tar Pay-TV - quai è la renfatscha da la CumCo. Keystone

Raschuns per il chasti

La Swisscom haja malduvrà il monopol en plirs puncts. Uschia haja ella scumandà ad intgins concurrents mintg'offerta d'emetter sport live sin lur plattafurmas, scriva la CumCo.

Ad auters concurrents sco per exempel a la Cablecom haja la Swisscom mo dà access ad ina purschida da sport reducida.

La Swisscom renviescha il chasti

Il concern da telecommunicaziun n'accepta betg la decisiun. La Swisscom e sia firma affiliada Cinetrade sajan persvadidas d'avair agì endretg tar la commerzialisaziun da cuntegns da sport.

La Swisscom vegn ad examinar la disposiziun detagliadamain. En vista al chasti aut ed al caracter da princip da la decisiun vegnia la Swisscom a trair vinavant la decisiun al tribunal federal administrativ u sche necessari era al Tribunal federal.

Auters salidan la decisiun da la CumCo

Tant la concurrenta da la Swisscom UPC Cablecom sco era la Societad economica da las raits da communicaziuns svizras èn cuntentas dal chasti da la CumCo a l’adressa da la Swisscom.

RR novitads 09:00