La basa per l'affar actual era vegnida messa il 2015: Quella giada avevan decis las duas interpresas Swisscom e Tamedia da fusiunar lur plattafurmas da servetsch digitalas local.ch e search.ch sut in tet, numnadamain sut la Swisscom Directories SA.
Swisscom ha realisà opziun da cumpria
Quella giada era er vegnì fixà, che las duas co-possessuras hajan l'opziun, da decider mintgamai fin il 2018, sch'ellas vulan surpigliar il pachet d'aczias da l'autra part e daventar uschia possessura unica da la Swisscom Directories SA. La Swisscom ha uss fatg diever da quella opziun e surpiglia per 220 milliuns (plus mezs liquids betg necessaris per il manaschi) la part da la Tamedia.
L'affar vegnia fatg l'emprim quartal 2019, scrivan las duas interpresas en lur communicaziun en la rait.
L’interpresa che tutga uss per 100% a la Swisscom porscha sut il num localsearch divers servetschs da marketing en la rait. Ella ha in index vast da persunas e firmas – sumegliant al cudesch da telefon stampà dad ina giada. Tar ses chanals tutgan las plattafurmas local.ch e search.ch.
RR novitads 11:00
