Siglir tar il cuntegn

Svizra Swissmedic dat multa a trais ospitals svizzers

L'institut Swissmedic ha chastià trais ospitals svizzers cun ina multa. Els han cumprà e duvrà products medicinals dal Pakistan ch'eran tschufragnads. Pertutgads èn ils ospitals universitars da Turitg e Basilea sco era l'ospital chantunal da Son Gagl.

Canula vid il maun d'ina poppa artifiziala.
Legenda: Multa per Swissmedic pervia da canulas tschufragnadas (maletg da simbol). Keystone

Malgrà l'obligaziun n'hajan ils ospitals betg infurmà l'autoritad d'admissiun e da surveglianza Swissmedic davart ils products medicinals manglus. Uschia han ils ospitals violà a moda grevanta l'obligaziun d'annunzia. La pledadra da Swissmedic Danièle Bersier ha confermà in rapport dal «Tages Anzeiger» envers l'agentura da novitads svizra.

Canulas da ruina

Tar ils products medicinals tschufragnads sa tractia da canulas per operaziuns dal cor tar pops. Las canulas sajan per part stadas da ruina, stortas, che rumpevan spert u cuntegnevan scalgias da metal. Ils products derivan dal Pakistan ed èn vegnì distribuids dad ina firma en il chantun Zug.

Multa da 5'000 francs

Ils products manglus han ins chattà tar ina perquisiziun da la chasa da la firma a Zug. L'entschatta dal 2017 ha l'autoritad da surveglianza avert ina procedura penala cunter ils trais ospitals e la firma. Il fanadur han ils ospitals stuì pajar la multa da 5'000 francs. En cas da repetiziun è ina multa da 50'000 francs pussaivla.

RR novitads 12:00