Che l’AutoDaPosta SA pajà memia pauc spesas a ses chauffeurs e sias chauffeuras, n'è betg dispitaivel. La firma sezza ha confermà in rapport correspundent da la gasetta «Blick». Dispitaivel resta anc, quants onns enavos ch'il sbagl è succedì.
Sbagl cun cudeschar
Concret vai per pausas dals manischunzs che na sajan betg vegnidas cudeschadas a moda correcta. Entant haja l’AutoDaPosta SA fatg las adattaziuns necessarias. Radund 2 milliuns francs restituescha la AutoDaPosta a ses persunal retroactivamain. Quai per ils onns 2016 e 2017.
Restituir spesas da 2 onns enstagl da 5 onns
L'AutoDaPosta sa referescha sin il contract da lavur collectiv, nua che las spesas èn regladas. Quest è en vigur dapi l'entschatta 2016. E fin lura saja l'AutoDaPosta pronta da restituir spesas tralaschadas. Quai vesa il sindicat Syndicom auter: Citond il dretg d'obligaziuns hajan ils emploiads il dretg sin restituziuns dals ultims 5 onns.
Sindicat ha contactà AutoDaPosta
Ils ultims mais avevan plirs chauffeurs infurmà il sindicat Syndicom davart sbagls en ils rendaquints. Cunquai ch'adina dapli emploiads sajan s'annunziads tar il sindicat, hajan ins sminà in sbagl sistematic ed haja infurmà la AutoDaPosta, di il pledader da Syndicom Christian Capacoel.
RR novitads 17:00