Syngenta: reacziuns maschadadas sin l’annunzia da fusiun

L’annunzia, chi’l concern ChemChina vul surprender il concern d'agrochemia svizzer, Syngenta, ha procurà per diversas reacziuns. Dad ina vart vala il concern statal ChemChina sco investider serius. Da l’autra vart sa fan ils sindicats e la regenza da Basilea quitads per las plazzas da lavur.

Ils dus schefs sa dan il maun. Bild in Lightbox öffnen.

Legenda da maletgs: Daperina - Ren Jianxin (ChemChina) e Michael Demare (Syngenta) in mardi a Basilea, nua ch'els han annunzià lur plans. Keystone

Il president da la Confederaziun, Johann Schneider-Ammann (PLD), valitescha l’acquisiziun dal tuttafatg positivamain. La «ChemChina» saja ina firma fitg solida e haja ina buna basa strategica, ha el ditg a las medias a Berna. Il predsch aut che «ChemChina» è pront da pajar per «Syngenta» saja in bun segn, ha ditg Schneider-Ammann.

Ils sindicats han main buna speranza

Main buna speranza han ils sindicats «Unia» e «Syna». En ina communicaziun renda la «Syna» attent a pussiblas parallelas cun l’acquisiziun da l'interpresa svizra «Alstom» entras il concern american-internaziunal «General Motors». Da tut las grondas empermischuns da «General Motors» na saja restà nagut.

L’«Unia» è bain cuntenta che «ChemChina» na planisescha betg da stritgar plazzas da lavur en Svizra. Tuttina vul il sindicat garanzias da «ChemChina».

La regenza da Basilea avess preferì l'independenza

La regenza da Basilea ha reagì cun retegnientscha sin l'annunzia da «Syngenta». Sin dumonda da la sda ha ditg Christoph Brutschin, regent da Basilea, che la regenza avess preferì ina «Syngenta» independenta.

En Svizra lavuran 3’300 persunas per «Syngenta», en l'entir mund radund 28’000.

RR novitads 16:00