Siglir tar il cuntegn
Inhalt

Svizra Tamedia sto spustar cumpra da Goldbach

La chasa da medias Tamedia sto anc avair in zic dapli pazienza avant che surpigliar il concern da reclama Goldbach. Perquai che la Cumissiun da concurrenza examinescha anc la surpigliada, cuzza l'entir process pli ditg. Per motivs giuridics ha Tamedia ussa stuì dar en ina dumonda da prolungaziun.

Purtret da Christoph Tonini, il CEO da Tamedia.
Legenda: Christoph Tonini crititgescha la decisiun da la WEKO da pigliar sut la marella la cumpra da Goldbach. Keystone

La dumonda da prolungaziun per la surpigliada è vegnida approvada da la cumissiun responsabla. Enfin ils 31 d'october 2018 han Tamedia e Goldbach ussa temp, è scrit en ina communicaziun. Gia avant aveva Tamedia communitgà che la transacziun vegnia spustada almain sin settember u october.

L'offerta da Tamedia als acziunaris da Goldbach hajan tenor il resultat final da mez avrigl 97% dals acziunaris approvà. Tamedia aveva proponì CHF 35,50 per aczia da Goldbach u en tut 216 milliuns francs. Planisà è d'indemnisar il rest dals acziunaris suenter la surdada cun daners bluts e da dequotar la Goldbach Group.

Posiziun da monopol pussaivla

La WEKO ha lura fatg in stritg tras il quint a la Tamedia. En in'atgna communicaziun ha l'autoritad lura communitgà il matg ch'i hajan indizis che la chasa da medias pudess survegnir ina posiziun da monopol suenter la surpigliada. Tamedia cuntanschia cun 50 medias e plattafurmas digitalas ina gronda part da la populaziun svizra en tuttas regiuns linguisticas. Plinavant possedia Goldbach en Svizra ina posiziun ferma en la commerzialisaziun da medias electronicas.

Sche betg Tamedia lura Google e Facebook

Tamedia ha reagì senza chapientscha sin l'intervenziun da la cumissiun da concurrenza (WEKO). Il CEO, Christoph Tonini ha crititgà l'avust il proceder da la WEKO en in'intervista cun il portal online «Persoenlich.com». Fertant che la WEKO examineschia mais en e mais ora sche Tamedia survegnia lura ina posiziun da monopol en Svizra culian mintga di pli e pli blers daners als concerns da Google e Facebook.

Pauc plaschair ha Tonini probablamain era gì cura che la WEKO ha annunzià l'emna passada ch'i piglian era sut la marella la surpigliada da la «Basler Zeitung» entras Tamedia. Er qua ha la WEKO declera che Tamedia pudess suenter profitar d'ina posiziun da monopol.

RR novitads 10:00