Siglir tar il cuntegn

Svizra Tanta lavur sco anc mai per la duana

Sur 700'000 persunas passan mintga di ils cunfins svizzers. Las guardias da cunfin n'han anc mai stuì intervegnir uschè savens sco l'onn passà.

Guardias da cunfin che pacheteschan ora insatge.
Legenda: Blera lavur per la guardia cunfin. Keystone

Sur 700'000 persunas passan mintga di ils cunfins svizzers. Las guardias da cunfin n' han anc mai stuì intervegnir uschè savens sco l'onn passà. “Saja quai pertutgant la criminalitad sur ils cunfins, tar la migraziun illegala sco era tar la professiunala”, di Walter Pavel da l'administraziun federala da duana.

Dimorants illegals

Las cifras da l'onn 2014 mussan en spezial valurs maximalas en il champ da migraziun. Uschè èn s’augmentads ils cas da dimorants illegals, vul dir persunas senza documents valabels che lessan passar il cunfin. L'onn 2013 eran quai 12'000 persunas, be in onn pli tard 2'000 persunas dapli. Questas cifras da record mussan che la Svizra è pertutgada adina dapli da svilups internaziunals, uschia Pavel.

Conflicts han effect

Moviments da fugitivs da guerras e conflicts en pajais lontans hajan definitivamain in effect era per la Svizra. E per consequenza sa lascha constatar era in augment massiv da cuntrabanda da persunas. Da radund 200 cas l'onn 2013 hajan ins stuì intervegnir be in onn pli tard en bunamain 400 cas da cuntrabandists professiunals. Ed oz na vegnan las persunas betg pli manadas sur ils cunfins averts, sco muntognas e guauds, ma cun l’auto u cun il tren, sperond ch'els giajan sut en la massa.

Traffic sur cunfin piglia tiers

Era sch’i sa tracta da records, surprendentas n’èn questas cifras betg, di Walter Pavel. “Il traffic sur cunfin piglia tiers dapi onns. Adina dapli persunas passan ils cunfins, ma betg be persunas ma era martganzia.” E cun l'import e l'export augmentà crescha era qua la lavur e la cuntrabanda. E la cuntrabanda pertutga tut quai ch’è collià cun taxas. Tonnas da mangiativas vegnan importadas illegalmain. Per consequenza perda la confederaziun milliuns da taxas.

L’Administraziun federala da duana ha incassà l’onn 2014 23,6 milliardas francs. Quaièn radund 500 milliuns francs damain sco l’onn precendent. Declerar sa lascha quest pitschen minus cun in’activitad d’import main gronda sco l’onn 2013.