Siglir tar il cuntegn

Header

cuntegn

Tar ina pussaivla infecziun Il temp da quarantina resta tar 10 dis

L'Uffizi federal da sanadad na vul per il mument betg reducir il temp da quarantina sin damain che 10 dis. Ins saja però vidlonder d'evaluar ensemen cun la task force, tge effect che quai avess e sut tge cundiziuns ch'ina reducziun fiss pussaivla. Quai ha ditg Virgine Massery dal BAG la gievgia davant las medias.

video
Virgine Masserey: «Nus evaluain il temp da quarantina»
Or da News-Clip dals 17.09.2020.
laschar ir. Durada: 1 minuta 27 Secundas.

Ultra da quai ha l'Uffizi federal da sanadad decis da be pli publitgar las novas infecziuns da corona durant ils dis da l'emna. Quellas da la sonda e dumengia vegnan da nov mintgamai publitgadas il gliendisdi. La raschun è che las cifras quotidianas na dettian betg ina buna survista da la situaziun. I saja meglier dad observar il svilup dad emna ad emna, ha ditg Masserey.

530 novs cas la gievgia

Per la Svizra ed il Lichtenstein annunzia il BAG la gievgia 530 novas infecziuns da corona – 2 da quellas en il Grischun. La mesemna aveva l'Uffizi federal da sanadad anc annunzià 514 novs cas, il mardi 315. Ils ultims dis èn 3,9% da tut ils tests fatgs, stads positivs.

Dapi la mesemna hai plinavant dà 7 ulteriurs mortoris en consequenza dal virus, 18 ulteriuras persunas han stuì ir en l'ospital pervi da Covid-19. En il Grischun vegn il mument ina persuna tgirada en l'ospital.

RTR novitads 17:00

Artitgels legids il pli savens