Nagin’organisaziun possia sfurzar la Svizra da surpigliar las reglas novas per la taxaziun da concerns gronds. Uschia la cussegliera federala Karin Keller-Sutter a chaschun da la preschentaziun dal project da votaziun a Berna. Las Svizras ed ils Svizzers possian decider ils 18 da zercladur a moda suverana a l'urna sch'i vulan far part. La ministra da finanzas ha dentant era fatg cler...
La taglia minimala, quella vegn. Cun u senza la Svizra. Quai è sco in eveniment da la natira, quai ha ussa simplamain lieu.
La dumonda saja simplamain sche nus vulain salvar ils daners en Svizra u laschar ir els en l’exteriur.
Repartiziun malgista
La cussegliera naziunala socialdemocratica Sandra Locher-Benguerel beneventa fitg questa armonisaziun sin nivel internaziunal. Uschia possian ins restrenscher la concurrenza fiscala tranter ils pajais.
Problematic è tenor ella percunter co la Svizra veglia reparter las entradas supplementaras tras la tariffa da taglia minimala. ¼ duai la Confederaziun survegnir, ¾ ils chantuns che ston auzar lur taglias per quellas interpresas. Pli gist fiss stada ina repartiziun eguala, mez per la Confederaziun e mez per ils chantuns. Uschia avess'ins pudì investir dapli daners per il bainstar da l'entira populaziun, di Sandra Locher-Benguerel.
Dapli daners per la tgira d’uffants cumplementar a la famiglia, dapli daners per l’AVS. Qua avess ins ussa la pussaivladad.
Fatg saja dentant ch’ins dovria quels daners per distgargiar fiscalmain intginas tschient interpresas grondas ed internaziunalas.
Autonomia chantunala
Il chantun Zug haja per exempel gia annunzià ch'el veglia duvrar ils daners supplementars da la tariffa da taglia minimala per sbassar las taglias sin la facultad ed augmentar las deducziuns per uffants. Quai argumenteschia la concurrenza fiscala tranter ils chantuns cun tut ils effects negativs, di Locher-Benguerel.
Karin Keller-Sutter na vesa quai betg uschè dramatic. Ch'ils chantuns possian decider sez davart lur daners saja bun e gist.
Ils plans ch’il chantun Zug ha u che auters chantuns han ston l’emprim en las regenzas, en ils parlaments chantunals e forsa datti anc votaziuns da referendum.
I saja da spetgar ch’ils chantuns pon decider sez co els veglian duvrar lur daners. Impurtant saja ussa che la populaziun dettia glisch verda per la realisaziun da la tariffa da taglia minimala en Svizra. Il squitsch da temp saja numnadamain gronds. L'UE haja annunzià d'introducir quella l'entschatta da l'auter onn. Sin lura stoppia era la Svizra esser pronta. In plan B en cas dad in NA na dettia betg, uschia Karin Keller-Sutter.
Alternativas dettia adina, respunda Sandra Locher Benguerel.
Tar in Na pon ins far immediat ina nova schliaziun en il parlament.
In Na dettia pervia da la repartiziun malgista da las entradas ord la tariffa da taglia minimala. Era fissi pussaivel da stgaffir impuls e stimuls per che las interpresas restian en Svizra e che la populaziun haja insatge da quels daners, di Locher-Benguerel.
Squitsch da temp
Sch'il temp per in segund project da votaziun tanschess propi è dentant fitg dispitaivel. Il Cussegl federal e las partidas grondas vulan numnadamain desister d'in termin da votaziun il november. E lura pudessan las Svizras ed ils Svizzers pir decider la primavaira anc ina giada davart l’introducziun da la taglia minimala en Svizra.
