- En Svizra èsi fin ussa vegnì confermà 28 cas da la varianta britannica, quai en 7 chantuns
- Fin la stad duain tuts pudair sa laschar vaccinar. La Svizra ha empustà 7,5 milliuns dosas.
La situaziun dal virus en Svizra stagnescha il mument sin aut nivel, va sin il pli in zic enavos. Quai ha Virginie Masserey da l'Uffizi federal da sanadad ditg avant las medias. Fin ussa èsi vegnì cumprovà 28 cas da la versiun britannica en set chantuns.
Betg tut las persunas cun il virus britannic hajan però gì directamain contact cun ina persuna ord la Gronda Britannia. Quai saja ina ulteriura raschun che las cifras stoppian vegnir reducidas vinavant. Sche quests cas creschian vinavant, vegnia il provediment da sanadad a ses cunfins, uschia Masserey.
La rata da reproducziun èn Svizra è il mument tar 0,89. En otg chantuns è il dumber però sur 1.
Fin la stad duain tuts pudair sa laschar vaccinar
En vista a las vaccinaziuns duai en curt esser pront il sistem d'informatica, nua che tut quels che vulan sa laschar vaccinar, pon sa laschar registrar. Plinavant pon ins crear in cudeschet da vaccinaziun digital sin meineimpfungen.ch. Là pon tut las vaccinaziuns vegnir registradas.
Quai che pertutga la furniziun da las vaccinaziuns ha Nora Kronig dal BAG ditg, ch'els fetschian quint ch'i dettia fin la stad avunda dosas. Uschia duessan tut quels che vulan pudair sa laschar vaccinar fin lura. Tut en tut hajan ins empustà 7,5 milliuns dosas.
