Siglir tar il cuntegn

Header

cuntegn

Taskforce cusseglia homeoffice Passa 3'000 novas infecziuns ha il BAG annunzià oz

En la Svizra ed en il Principadi da Liechtenstein hai dà tenor l’Uffizi federal da sanadad BAG – aifer 24 uras 3’105 novas infecziuns cun il coronavirus. Mortoris annunzià il BAG tschintg novs. Il venderdi suentermezdi han plirs experts explitgà a Berna la situaziun difficila.

La gievgia aveva l’Uffizi federal da sanadad annunzià 2’613 novas infecziuns. In di pli tard è la cifra creschida sin 3’105 cas. Cura che la pandemia furiava il pli fitg, era il pli aut dumber da novas infecziuns stà ils 23 da mars cun 1’464 cas.

Il tagl da set dis dals cas confermads è oz venderdi tar 1’692. Quai èn 150% dapli che l’emna passada. Il trend è uschia sin fitg aut nivel e cun tendenza zunt fitg ensi.

Lavurar a chasa e vast obligatori da mascra

Il venderdi suentermezdi han pliras persunas dal fatg infurmà a Berna, tranter auter era Martin Ackermann da la taskforce naziunala Covid-19. Las cifras sajan in schoc, dentant er ina schanza. 10 persunas infecteschian en media 15 ulteriuras. I haja num da franar in'ulteriura acceleraziun.

Tenor Ackermann dovri dapli mesiras. Cunzunt da tegnair en egl saja il problem da las infecziuns che succedian en spazis serrads.

video
Martin Ackermann: «Mesiras na tanschan betg»
Or da News-Clip dals 16.10.2020.
laschar ir

Contact tracing ha problems

Rudolf Hauri, il president da l'associaziun dals medis e medias chantunalas, ha ditg ch'els n'hajan betg quintà ch'il coronavirus sa derasia uschè spert. I dettia problems cun il contact tracing, i na saja betg pussaivel da tegnair en egl tut las persunas infectadas. Perquai saja era impurtant, ch'ils pertutgads daventian sezs activs e s'annunzian tar ils posts correspundents.

video
Rudolf Hauri: «Grev da cuntanscher tut las persunas da contact»
Or da News-Clip dals 16.10.2020.
laschar ir

Puspè 18 mais lavur curta

Las mesiras urgentas en connex cun l'Assicuranza cunter la dischoccupaziun èn vegnidas adattadas. Quai ha ditg Boris Zürcher, il manader da la Direcziun per lavur Seco. Sco gia ina giada vala per interpresas, che la lavur curta è vegnida schlargiada da 12 sin 18 mais. E per emprendists na datti nagina lavur curta. Fin uss saja vegnì pajà per lavur curta 7,7 milliardas francs.

RTR novitads 14:00

Artitgels legids il pli savens

Scrollar a sanestra Scrollar a dretga