Siglir tar il cuntegn
Inhalt

Svizra Taxas d'emissiun pudessan bainbaud crescher

Ieli da stgaudar e gas natiral pudessan daventar pli chars a partir dal 2018. In automatissem da la lescha augmentass numnadamain la taxa da CO2 sin carburants sche las emissiuns en Svizra na van betg enavos marcantamain, e quai anc quest onn.

In tgamin cun fim.
Legenda: La temperatura e l'aura sur l'entir onn ha ina grond'influenza sin il diever da carburants fossils per stgaudar. Keystone

Sche las emissiuns da CO2 na sa reduceschan quest onn betg per almain 4,4% en Svizra pudess la taxa da CO2 sin carburants s'augmentar a partir dal 2018. Quai communitgescha il Departament federal per ambient BAFU.

En la lescha è previs in automatissem correspundent. Quest onn stuessan las emissiun esser per 27% pli bassas ch'il 1990. Il 2015 eran ellas stadas per 23,6% pli bassas ch'il 1990.

Anc betg reducì avunda

Tenor WWF Svizra na tanschia la reducziun da l’onn passà betg per ademplir las finamiras da la conferenza da clima da Paris. La cunvegna prevesa da reducir las emissiuns sin null (netto) fin l’onn 2050. Be uschia possia il midament dal clima (+1,5°C) vegnir mantegnì constant.

Per la Svizra munta quai en consequenza mintg’onn ina reducziun da las emissiuns per 4%.

RR novitads 17:00