Quantas taxas per radio e televisiun ch'affars pajan, vegn calculà tenor la svieuta. Uschia vegnan ils affars partids en sis differentas categorias. Quai sajan memia paucas categorias, constatescha il Tribunal administrativ federal oz en ina sentenzia.
Ina fatschenta ha purtà plant cunter las taxas ch'èn vegnidas calculadas. Malgrà ch'il tribunal ha constatà en il cas concret ina cuntradicziun a la Constituziun, refusa quel il plant sco tal. Tranter auter perquai che las taxas da radio e da televisiun sajan sin in nivel bass per affars, scriva el en ina communicaziun.
Il tribunal propona dentant al Cussegl federal dad analisar il sistem fin il pli tard mez da l'auter onn. A maun da l’analisa duai il Cussegl federal anc ina giada adattar il sistem manglus. La sentenzia po vegnir tratga vinavant tar il Tribunal federal.
RR novitads 12:00