Siglir tar il cuntegn

Svizra Taxas directivas empè da taxas da promoziun

Il cussegl federal vul introducir taxas directivas per la midada da l'energia a partir dal 2021. El ha avert la consultaziun davart in nov artitgel da constituziun.

distributur da benzin
Legenda: Per entant naginas taxas sin carburant. Keystone

L’artitgel fixescha che la confederaziun po incassar taxas da clima sin carburant ed electricitad.

En in'emprima fasa na vul il cussegl federal dentant betg inchargiar il carburant, pia benzin e diesel. Quai tenor il departament da finanzas. I saja numnadamain gia previs en il project davart il fond da vias in supplement da taglia sin petroli per 6 raps il liter.

La finamira da questas taxas da cuntanscher pli effizient e pli favuraivel las finamiras dal clima e da l'energia. Il retgav da las taxas duai vegnir redistribuì a la populaziun e l'economia.

Reacziuns maschadadas...

Las reacziuns sin las taxas directivas proponidas dal cussegl federal èn differentas: ils Verds, Verd-liberals, sco era la fundaziun svizra d'energia beneventan la consultaziun. La fundaziun insista dentant sin ina taxa supplementara sin il carburant.

Economiesuisse, la federaziun da las interpresas svizras, fa attent da resguardar il resultat da votaziun dal suveran ch'è s'exprimì cleramain encunter ina taglia sin energia.

L'uniun dals proprietaris da chasas è da l’opiniun che la midada d'energia vegnia fatga sin donn e cust dals locataris e possessurs da chasas.

RR novitads 15:00