Il Touring Club Svizra (TCS) na vul nagins agens helicopters per il transport d’urgenza en Svizra. Sco il TCS scriva en ina communicaziun a las medias, sajan els sa retratgs per fin november ord l’interpresa aviatica «Alpine Air Ambulance».
En il futur vegnia la «Alpine Air Ambulance» a gestiunar vinavant suletta ils helicopters, scriva il TCS.
In’analisa haja mussà, ch’il basegn per transports d’urgenza cun helicopters en Svizra saja pitschen. Il TCS veglia perquai sa concentrar sin il transfer da pazients ord l’exteriur e collavurar en futur pli stretg cun la REGA.
