Il glindesdi a bun'ura ha in'explosiun destruì a Denens en il chantun Vad in'antenna da telefonins che vegn nizzegiada da Swisscom e da Salt. La Polizia chantunala suppona in motiv criminal.
Entras l'explosiun ed il fieu ch'igl ha dà èn vegnids donnegiads ils fils ed ina part da la pitga. Il local che tutga tar l'antenna saja disfatg dal tut. Ils pumpiers han pudì stizzar il fieu. Blessads n'hai dà nagins, la procura publica ha avert in'investigaziun.
Nagin project da 5G al lieu
En quest lieu na saja planisà nagin project da 5G, ha confermà il pledader da la Swisscom, Christian Neuhaus, sin dumonda da l'agentura da novitads Keystone-SDA. Dentant haja gia dà il passà acts da vandalissem cunter l'antenna.
RR novitads 11:00++