Schegea che las fatschentas sentan che l’internet vegnia duvrà pli fitg els temps da homeoffice, na fetschia quai betg ora massa sch’ins mira sin la capacitad da l’internet.
Ins sa cumparegliar la situaziun cun in final dals campiunadis da ballape – lura miran era fitg blers il medem mument televisiun.
Mender saja mirar televisiun sin Swisscom TV u per exempel Netflix. Quai dovria bler dapli capacitad, decleran Stephanie Niggli da la UPC e Sabrina Hubacher da la Swisscom.
Glindesdi hajan uschè blers mirà televisiun sco normalmain ina dumengia, di Sabrina Hubacher. Uschia che la capacitad è avant maun.
Telefonar è il problem
Il problem saja en il mument che bler daplirs èn vid telefonar. Damai che tuts èn el homeoffie communitgeschian els savens sur telefon u mobile, quai er sur pli lung temp. Uschia che la rait da la Swisscom era glindesdi per part surchargiada e singuls telefons na sajan betg ir da colliar.
Ins sto chapir sche la rait è surchargiada e singuls telefons na van betg da colliar.
Sco Sabrina Hubacher di, sajan els vid prender mesiras ed engrondir la capacitad da la rait.
Dentant priorisescha la Swisscom en quels cas ils numers d’urgenza. Pertge ì saja il pli impurtant che l’organisaziun d'intervenziun d'urgenza (polizia, pumpiers e sanitad) saja cuntanschibla.
Netflix e Youtube vegnan tschentads giu – na!
Sco il BAKOM conferma envers RTR ha il Cussegl federal teoreticamain la pussaivladad da restrenscher u tschentar giu inqual servetschs en l’internet per cas che la capacitad da l’internet per lavurar da chasa anora na tanschess betg pli.
Dentant na saja quai anc ditg betg il cas. Tschentar giu Netflix, Youtube u autras paginas en l'internet na stettia anc gnanc en discussiun.
