Siglir tar il cuntegn
cuntegn

Svizra Televisiun avant print e radio

La televisiun ha la pli gronda influenza sin la furmaziun da l’opiniun en Svizra.

Telecomando e televisiun
Legenda: La televisiun ha la pli gronda pussanza da furmar l'opiniun da las Svizras ed ils Svizzers. Keystone

Quai avant la pressa, il radio e las medias online. A quella conclusiun vegn il monitur da medias che l’Uffizi federal da communicaziun Bakom ha publitgà il mardi per l’emprima giada.

SRG SSR avant Tamedia

La chasa da medias cun la pli grond'influenza è tenor il monitor la SRG SSR cun ses programs da televisiun e da radio e sia paginas en l'internet. Sin il segund post suonda Tamedia che edescha tranter auter la gasetta Tages-Anzeiger e la gasetta da pendularis 20 minutas.

Sch'ins miria sin ils singuls programs e las singulas gasettas saja gist la gasetta gratuita, che vegn publitgada en trais linguatgs naziunals, il med da massa cun la pli grond'influenza sin la furmaziun da l'opiniun en Svizra, di il Bakom.

Sistem equilibrà

Tut en tut mussia la retschertga, che la Svizra possedia in mund da medias multifar che garanteschia a la populaziun svizra da pudair sa furmar in'opiniun equilibrada, concluda l’Uffizi federal da communicaziun.

RR novitads 12:00