Siglir tar il cuntegn
cuntegn

Svizra Tema migraziun fa anc dapli quitads en Svizra

Tenor las ultimas retschertgas da gfs.bern per la SRG SSR era la migraziun gia il tema central tar la populaziun svizra. Passa 2/3 da las persunas han inditgà la migraziun sco problem il pli impurtant u segund-impurtant. Pia è il trend s'accentuà.

Il tema migraziun fatschenta la populaziun svizra il pli fitg.
Legenda: Il tema migraziun fatschenta la populaziun svizra il pli fitg. RTR

Era il settember è il tema migraziun en il center dals quitads da las 1'253 persunas dumandadas. 67% dals dumandads taxeschan la migraziun sco il problem central ubain segund-impurtant da la Svizra. Quai vers ils 49% da la retschertga dal fanadur.

Anc mai èn las spetgas en ina campagna electorala stadas uschè monotematicas ils ultims 20 onns sco questa giada cun la migraziun.
Autur: Retschertga gfs.bernsin incumbensa SSR SRG
Differents temas portan differenta fidanza en tschertas partidas.
Legenda: Differents temas portan differenta fidanza en tschertas partidas. RTR

Bler pli tard vegnan quitads sco l'AVS (18%), tematicas enturn las cunvegnas bilateralas cun l'Uniun europeica (16%) e la dischoccupaziun (15%). Per l'emprima giada betg aifer ils 5 quitads che fatschentan il pli fitg èn la midada da l'energia e las dumondas enturn l'ambient.

Cumpetenzas: PS per sozial, PPS per migraziun e PLD per Europa

Las persunas ch'han inditgà lur quitads centrals han en mira surtut 3 partidas per schliar ils problems. PPS, PS e PLD han pon dominar mintgamai ina tematica per els, din ils dumandads:

  • La PPS è tenor ils dumandads la partida la pli cumpetenta per schliar las dumondas da la migraziun. Era sche la cumpetenza attribuida è sa reducida cun las ultimas retschertgas, survegn la PPS la nota da cumpetenza da 25% tar la migraziun.
  • A la PS vegn attribuì la cumpetenza per schliar ils problems da al segirtad sociala e la dischoccupaziun. Surtut tar la tematica da la dischoccupaziun ha la PS tenor ils dumandads pudì augmentar la cumpetenza sin 32%.
  • La PLD duai schliar il meglier las tematicas enturn las cunvegnas bilateralas cun l'Uniun europeica. Era la PLD ha pudì augmentar sin 28% las persunas che sa fidan dad ella per schliar las tematicas enturn l'Europa e las bilateralas.

La PES avessia il champ da cumpetenza tar las dumondas per l'ambient. Questas problematica na ranschescha però betg pli tranter ils emprims 5.

RR novitads 17:00

La retschertga

Sin incumbensa da la SRG SSR ha l'institut gfs.bern fatg la retschertga  cun 2'011 intervistas tar votantas e votants cun domicil en Svizra, tranter ils 23 ed ils 30 da settember 2015. La selecziun è vegnida fatga tenor criteris represchentativs.

1'253 persunas han ditg ch'ellas veglian sa participar a las elecziuns. La toleranza tar ils resultats da las intervistas munta a +/-2,2%.