La Svizra sco insla da temp è en sasez nagut da nov. Gia il cumenzament dals onns 80 è ella numnadamain stada in'insla da temp. Ils pajais vischins han numnadamain cumenzà a midar l'ura – la Svizra pir in zic pli tard. Quai ha dà gronds dischavantatgs per l'economia ed er per chaussas fitg banalas sco il traffic sur cunfin.
Quai na fiss ozendi betg bler auter, manegia Jürg Niederhauser da l'institut federal per metrologia, l'institut che sa fatschenta e guarda dal temp en Svizra. Gist cun pajais vischins saja il contact fitg stretg ed i pudess daventar problematic. Saja quai tar l'urari dal tren che sto ir sur cunfin u tar il contact cun il collega da lavur en Germania. Perquai fissi da principi pli simpel sche la Svizra s'adattescha al temp da ses pajais vischins e na daventa betg in'insla da temp, uschia Jürg Niederhauser.
Consequenzas er per il mintgadi
Betg mo sin ils contacts economics e da traffic sur cunfin vess la midada da sistem in'influenza, mabain er sin noss mintgadi. Prendì il cas ch'ins midass tar temp da stad permanent: Lura stauschan ins il «cler» vers la saira. La stad avessan nus bain ditg cler e pudessan uschia giudair il sulegl. L'enviern dentant giess il sulegl pir si fitg tard e cunzunt en las valladas alpinas sentiss ins quai, uschia l'expert da temp.
Auter tar il temp d'enviern permanent: Là stuschass ins il «cler» vers la damaun, vul dir la stad giess il sulegl si fitg baud e la saira vegniss quai pli baud stgir. Il medem l'enviern, i vegniss la damaun pli baud cler. La saira na dependia dentant betg uschè fitg sche temp da stad u temp d'enviern, tenor Jürg Niederhauser vegnia uschè u uschia fitg baud stgir.
RR actualitad 08:00
