En ils pli blers lieus da la Svizra ha la rait per mesirar la schelira permanenta registrà novs records da temperaturas. Quai han dà enconuschent las academias da las scienzas Svizra.
En il glatscher dal Corvatsch è la schelira permanenta en ina profunditad da 20 meters per exempel sa stgaudada dal 2009 fin il 2015 da -1.5 grads sin -1 grad. Las temperaturas da record sco er il trend da sa stgaudar na sajan dentant betg il resultat da singulas stads chaudas mabain da las cundiziuns en general fitg chaudas dals davos onns.
Er il moviment dals glatschers s'augmenta
Ils glatschers che sa cumponan da glera e schelira permanenta èn sa muventads pli spert l'onn d'observaziun 2014/2015. Cumpareglià cun l'onn d'observaziun passà en els sa muventads 20% pli spert.
Ils moviments dals glatschers ed il svilup da la schelira permanenta vegnan registrads en Svizra dapi 10 fin 25 onns.
Il stgaudament po daventar in privel
La schelira permanenta che vegn stgaudada po avair in'influenza sin la stabilitad da las spundas. Uschia po ì dar dapli bovas, bovas pli grondas ni er bovas en lieus che n'eran betg enconuschents fin qua per bovas. Per las autoritads muntan ils resultats ch'i sto vegnir guardà en il futur, nua ch'i vegn bajegià, nua ch'i dat forsa novs territoris da privel e sch'ins sto forsa remplazzar stabiliments existents sco per exempel lavineras. Las qualas èn per regla fermadas en la schelira permanenta e perdessan cun il stgaudament da questa la stabilitad.
RR novitads 12:00