Siglir tar il cuntegn

Svizra Terminà transports d'aua sin las alps

Pervi da la setgira han helicopters da l'armada transportà questa stad passa 1'300 tonnas aua sin alps svizras.

in transport d'au arriva, plirs umens svidan il satg che penda giu d'in helicopter.
Legenda: L'armada svizra ha transportà en tut passa 1'300 tonnas aua sin alps. Keystone

Perquai ch'i è vegnì a plover e perquai che la stagiun d'alp è gia a fin en tscherts lieus, ha l'armada svizra pudì terminar la gievgia saira ils transports d'aua sin las alps. Quels transports aveva l'armada fatg pervi da la setgira en plirs chantuns. Uschia han ins pudì evitar che las alps han stuì vegnir stgargiadas pli baud.

Sco quai ch'il Departament federal da defensiun communitgescha, hajan ils helicopters da l'armada svizra transportà dapi ils 20 da fanadur passa 1'300 tonnas aua sin las alps en ils chantuns Vad, Friburg, Berna, Son Gagl, Appenzell Dadens, Glaruna e Lucerna. Ils pli blers transports d'aua ha l'armada fatg en il chantun Vad, cun bunamain 600 tonnas.

Sper l'aua han ils helicopters er transportà passa 18 tonnas material sco uders, pumpas e batschigls d'aua. En ils chantuns Vad e Berna è er il corp d'agid en cas da catastrofas vegnì en acziun per installar e deinstallar batschigls d'aua.

RR novitads 12:00