Il territori da skis Flumserberg ha pir pudì avrir da Silvester. Ils ultims dis han uschia 6'000 fin 7'000 persunas visità mintga di il territori. Quai saja radund 20% damain ch’ils onns avant, ha ditg il schef da las pendicularas, Heinrich Michel, envers l'agentura da novitads Keystone-SDA.Els sajan dentant fitg cuntents cun questas cifras, uschia Michel.
Era 20% damain giasts sur las festas hai dà en il territori da skis dad Adelboden-Lenk, en la Part Sura Bernaisa, ha declerà in pledader. Las pendicularas grischunas han communitgà gia sonda, ch’ellas hajan dapi l’entschatta da la stagiun dumbrà 17% damain giasts e fatg bunamain 23% damain svieuta che l’onn passà.
Mesiras da protecziun vegnan resguardadas bain
L'acceptanza dals skiunzs e las skiunzas per las mesiras per franar la derasaziun dal coronavirus sajan grondas. Quai han declerà ils responsabels da pliras pendicularas. Ils giasts hajan purtà mascrinas e per gronda part sa tegnì vid las distanzas en ils spazis da spetga.