La fasa da stizzar saja a fin ed uss sajan ins en la fasa da survegliar. Pervia da la setgira en la regiun, la cumposiziun dal terren e las atgnadads da fieus per terra saja quai pussibel ch’i cumenzia puspè a brischar. Uschia vegnia il terren surveglià da di e da notg, scrivan ils pumpiers da Bellinzona.
Duas emnas en acziun
Radund duas emnas èn ils pumpiers stads en acziun al Monte Gambarogno per stizzar il fieu. Quel è rut ora la dumengia ils 29 da schaner sut il Lago Maggiore. Anc il medem di ha la populaziun da Indemini stuì bandunar per plirs dis lur chasas.
L’incendi da guaud haja probablamain cumenzà, perquai che dus umens malprecauts hajan fatg in fieu, ha la polizia chantunala communitgà l’emna passada. Quels hajan bivacà en il territori. Avant che ir a durmir, n’hajan quels betg stizzà endretg il fieu.
Scumond da far fieu
Sco en il Tessin èsi er en il Grischun dal Sid pli che sitg. Dapi mez schaner vala in scumond absolut da far fieu en il liber.
