Suenter numerus cas da mortori en ina chasa d'attempads a Sementina en il chantun Tessin ha la procura publica avert ina procedura penala. A trais persunas vegn renfatschà mazzament per negligientscha e d'avair cuntrafatg a la lescha d'epidemia. I sa tractia dal directur general, da la directura medicala e d'ina ulteriura persuna, han communitgà la procura publica e la vischnanca da Bellinzona.
Las persunas accusadas sajan gia vegnidas interrogadas. Ad ellas vegn tranter auter renfatschà d'avair cuntrafatg ad ordinaziuns da las autoritads. Tuttas han lavurà en la chasa d'attempads pertutgada a Sementina. La vischnanca da Bellinzona scriva da quatter persunas pertutgadas.
La procura publica ha avert la procedura suenter ch'ella ha examinà ils documents ch'il servetsch medical chantunal ha mess ensemen.
Tenor rapports da medias èn passa 20 cussadentas e cussadents da la chasa d'attempads mortas tranter mars e matg 2020 pervi da Covid-19.