Il cusseglier da stadi tessinais, Norman Gobbi ed il prefect da Como, Bruno Corda han suttascrit la cunvegna che duai garantir sustegn e collavuraziun sur ils cunfins. En questa cunvegna èsi definì co proceder en cas da catastrofas da natira ubain en cas da catastrofas chaschunadas entras umans.
Collavuraziun dapi il 1995
Questa collavuraziun è gia previsa dapi l'onn 1995 en ina convenziun tranter la Svizra e l'Italia. Entras la nova cunvegna possian omaduas partidas dentant reagir pli svelt sch'i fa da basegn. En il futur na stoppia il Tessin betg contactar gl'emprim il Cussegl federal ed incumbensar lez da contactar la regenza taliana - da nov possian ins prender si contact immediat cun Como. L'entira birocrazia vegnia uschia reducida.
RR novitads 17:00