L'aura sitga da las ultimas emnas ha augmentà en il Tessin l'impestaziun da l'aria. En consequenza ha la regenza tessinaisa prendì ulteriuras mesiras. Mardi na dastgan autos da diesel, che chaschunan bleras emissiuns, betg pli charrar.
La regenza tessinaisa ha rinforzà sias mesiras cunter l'auta concentraziun da pulvra fina en l'aria. La populaziun vegn plinavant admonida dad ir uschè pauc sco pussaivel cun auto e da duvrar ils meds publics.
Sco stimulaziun è il traffic public gratuit. Gia dapi oz suentermezdi vala ina limita da tempo dad 80 km/h sin l'autostrada A2 tranter Chiasso e Rivera.
La valur maximala da pulvra fina da 50 milligrams per meter cubic è vegnida surpassada la fin da l'emna passada per bler.
