Finamira dal test saja da stgaffir transparenza e da sustegnair ils sforzs dad instituts da finanzas che vulan manar lur investiziuns en vials che sustegnan il clima, scriva l'Uffizi federal per l'ambient. Ils resultats mussian emprims progress. Ma la finamira ch'il martgà da finanzas duai surpigliar ina rolla impurtanta tar las finanzas persistentas, hajan ins anc manchentà.
Il tema da la supportabladad per il clima saja entant bler pli preschent, ma la realisaziun saja anc manglusa, ha declerà Silvia Ruprecht da la secziun politica da clima da l'Uffizi federal per l'ambient. Total vegnia investì il mument quatter giadas dapli en firmas che produceschian electricitad or da combustibels fossils, sco charvun ed ieli, che quai ch'els investeschan en producents d'energias regenerablas.
Firmas che lavuran cun combustibels fossils pudessan en avegnir daventar in pli grond ristg per investiziuns, pervi da mesiras politicas per il clima.
Sanaziun da bajetgs sco schanza
Gronda influenza sin la reducziun d'emissiuns hajan possessuras e possessurs d'immobiglias. Radund 70% da talas immobiglias sajan il mument anc stgaudadas cun ieli u gas. Las cassas da pensiun vulan remplazzar 20% dals stgaudaments dad ieli e 10% dals stgaudaments da gas entras energias regenerablas.
