Igl ha stuì ir spert. L'entschatta da la pandemia han ins stuì bajegiar si centers da tests uschè spert sco pussaivel. La Confederaziun aveva surpiglià ils custs dals tests uschia che nagin avess stuì desister sin in test perquai ch'i saja memia char.
Cassas da malsauns han gidà da circular ils daners
Ch'ils daners circuleschan tranter ils centers da test, ils labors e la Confederaziun ha la cassa da malsauns gidà. Quai ha la controlla da finanzas onurà en ses rapport.
Quai che n'ha betg funcziunà è che las cassas da malsauns n'avevan betg l'incumbensa da trametter in rendaquint a tut las persunas testadas. Quai saja stà in grond manco. Perquai che be la persuna testada pudeva uschia controllar sch'igl ha dà in test u betg.
Nagina transparenza tar localitads da test
Plinavant manchia la transparenza sur las localitads da test. Ils numers da rendaquint sajan stads suttapost per maldiever. Per exempel saja stà pussibel ch’in purschider da tests haja pudì far tests da corona cun in numer da rendaquint en l’entira Svizra e betg mo en in chantun.
BAG ha gia pudì sclerir divers cas
Il BAG ha tenor atgnas indicaziuns gia pudì sclerir divers cas da fraud. En pli restia anc temp da chattar dapli fraudaders, cunquai ch’il termin da surannaziun muntia a tschintg onns. Il donn chaschunà muntia a radund 20 milliuns francs, scriva l’associaziun da las cassas da malsauns Santésuisse.
