En Svizra pudess la dumonda, tgi ch'è immun cunter il coronavirus u ha tut tenor gia gì quel, bainbaud vegnir respundida. Dapi il venderdi sajan tals tests d'anti-corpuls disponibels en ina gronda part dals labors svizzers, rapporta il «TagesAnzeiger».
Anc èn ils tests pervi da la gronda dumonda contingentads. La pli gronda quantitad da tests survegnan perquai ils labors dad instituts universitars. Emprima finamira èsi da testar il persunal dals ospitals. Tenor las enconuschientschas actualas valan numnadamain persunas che han gia gì il coronavirus sco immun, perquai ch'els han sviluppà en lur corp anti-corpuls. Quai po er esser il cas tar persunas ch'han gì be levs sintoms ed èn strusch sa sentidas malsaunas.
Ils tests d'anti-corpuls èn pli bunmartgads e main cumplitgads che quels per cumprovar il virus. Ils tests na pon però betg vegnir fatgs sulet a chasa, perquai ch'ils resultats ston vegnir interpretads dad in medi. E propi cumprovar pon ins ils anti-corpuls pir 2 emnas suenter in' infecziun.
Dapli fatgs, infurmaziuns ed istorgias chattais qua.