Siglir tar il cuntegn

Header

audio
Mezdi: Cussegl dals chantuns – budget 2018
Or da Actualitad dals 28.11.2017.
laschar ir. Durada: 4 minutas 17 Secundas.
cuntegn

Svizra Tge far cun 442 milliuns francs?

En il parlament a Berna vegni fatg quints. La sessiun d’enviern ha cumenzà quest’emna ed en il center stattan las finanzas da la Confederaziun. In dals blers puncts dispitaivels èn 442 milliuns francs ch'èn «libers», perquai ch'il pievel ha ditg na a la refurma da las rentas.

Ils politichers grischuns na vegnan betg perina, nua ch'ils 442 milliuns francs duain vegnir budgetads o apunta betg. Il cusseglier naziunal da la PCD, Martin Candinas, è d'accord cun il Cussegl federal ed il Cussegl dals chantuns. El intenda numnadamain d'investir 295 milliuns dals 442 milliuns francs per l’infrastructura da la viafier. Il rest da quels daners duain vegnir spargnads e betg budgetads.

In'allianza rara

Spargnar vul era il politicher da la PPS, Heinz Brand. El vul dentant spargnar tut ils 442 milliuns francs. Ils raps na stoppian betg vegnir spendids per tutta forza. Tenor el fissi gist da spargnar quels ed investir els per ina proxima refurma da las rentas che vegnia segir a vegnir. Cun quell’idea stat Heinz Brand cunter la proposta da la PPS. La partida vul numnadamain metter tut ils raps en la cassa da l’AVS. Quell’idea vegn era sustegnida da la collega da partida da Heinz Brand, Magdalena Martullo Blocher.

Era la PS vul metter ils raps en la cassa da l’AVS. I vegn discurrì d’ina allianza tranter la PPS e la PS en chaussa. Per Silva Semadeni fissan quels raps investids bain en la cassa da l’AVS. E sco plan B sustegness ella la proposta dal Cussegl federal, dad investir en l’infrastructura da la viafier.

Per Duri Campell da la PBD è la chaussa clara. Ils raps eran pensads per la cassa da l’AVS, e quella saja er la cassa che haja il pli da basegn da survegnir daners. Perquai vul el metter tut ils 442 milliuns francs en questa cassa.

Pachetar en il satg da durmir

Nua ch'ils 442 milliuns francs vegnan la finala mess, vegn decis durant la sessiun d’enviern. La schanza è dentant gronda ch'ils daners van en la cassa da l’AVS cun quai che la PPS e la PS han ensemen la maioritad da las vuschs. Dentant decis n'è anc nagut. En tut il budget datti divers puncts dispitaivels. Mo en il Cussegl naziunal èn vegnidas inoltradas var 100 propostas per midar il budget. Il cusseglier da las finanzas Ueli Maurer ha ditg als parlamentaris, ch'i saja da prender cun il satg da durmir, perquai ch'i pudess dar ina debatta che dura e dura.

RR actualitad 12:00

Artitgels legids il pli savens