Siglir tar il cuntegn

Header

cuntegn

Svizra Tgi che paja dapli vegn operà pli savens

Pazients cun assicuranza supplementara vegnan operads pli savens. Quai è la quintessenza dad in studi da l’uffizi federal da sanadad. Cunzunt tar operaziuns che pertutgan l'ortopedia, pia l'ossa e las giugadiras, è la differenza pulit marcanta.

Operaziuns da la schanuglia vegnan per exempel fatgas varga dubel uschè savens tar ils segirai privat e mez-privat che tar persunas ch’èn assicurà per la partiziun generala. Ina decleraziun per quella differenza savess esser che ospitals e chirurgs gudognan dapli tar quels pazients.

Star sur notg custa 5x dapli cun assicuranza privata u mez-privata

Quai pretenda en tutta cas in studi da l'interpresa da cussegliaziun PricewaterhouseCoopers (PWC). Tenor lez paja l’assicuranza da malsauns per in'operaziun ambulanta dal meniscus exactamain 2’400 francs. Sto il pazient star sur notg s'augmentan ils custs sin bunamain 7’000 francs. E sch'il pazient è assicurà a moda privata ni mez-privata creschan ils custs anc ina giada per varga 60 pertschient sin 11'500 francs.

Cumpareglià cun l'operaziun ambulanta nua ch'il pazient va suenter a chasa custa il star sur notg d'in pazient cun assicuranza privata u mez-privata pia bunamain 5 giadas dapli.

audio
Mezdi: Pazients assicurads bain vegnan operads pli savens
ord Actualitad dals 12.08.2016.
laschar ir. Durada: 3 minutas 17 Secundas.

Conclusiuns che van massa dalunsch

Per Christophe Kaempf da l'associaziun da las cassas da malsauns, Santésuisse, van las conclusiuns che vegnan tratgas in pau memia lunsch. Els na pretendian betg ch'i dettia nagin surpli d'operaziuns tar persunas cun ina segirada supplementara, dentant: «Sche la motivaziun da gudagnar bler dapli daners cun ils pazients cun in’assicuranza supplementara fiss uschè gronda lura sappian ins schon sa tschentar la dumonda pertge che quellas differenzas n’èn betg gia ussa pli grondas.»

Fidanza en l’etica da lavur dals medis

I saja fitg impurtant da tener en egl la qualitad da las prestaziuns sin il sectur da la sanadad. E tar quella qualitad tutgi era da renunziar sin operaziuns ni tractaments che na sajan betg necessaris e che chaschunian mo custs. Ella responsabladad vesa el cunzunt ils medis. «Quels han era in’etica da lavur e ston era decider tenor la sanadad ed ils basegns dal pazient tge ch’è il meglier per el e betg mo guardar per l’atgna bursa.»

Sceptica envers il studi er en Grischun

Marc Tomaschett, il maina fatschenta da l'organisaziun dals medis grischuns sa dosta cunter la rinfatscha ch'ils medis maldovrian il sistem per augmentar lur gudogn.

Savens saja uschia ch'ils pazients sajan gia s’infurmads egl internet e vegnian cun clers giavischs tar il medi. E pazients cun in’assicuranza supplementara hajan mintgatant era la tenuta che sch'els pajan gia dapli per l’assicuranza da malsauns lura duaja era vegnir fatg insatge.

E tge manegian ils ospitals? Sin nossas dumondas ha il l’Ospital chantunal a Cuira respundi ch'els na sappian il mument betg prender posiziun, quai damai ch'els hajan anc betg gì la pussaivladad da s'occupar cul studi.

Artitgels legids il pli savens