L'uschenumnada iniziativa da tgira vul far pli attractivas las professiuns en la tgira. Il comité d'iniziativa ha preschentà oz ses arguments. El di che l'iniziativa stgaffeschia meglieras cundiziuns da lavur, uschia che puspè avunda tgirunzas e tgirunzs lavurian en lur professiun. Actualmain manchian enturn 6'200 persunas dal fatg.
Il stadi d'urgenza en la tgira na smanatscha betg, el è gia daditg realitad.
Meglras cundiziuns da lavur
La pandemia ha anc engrevgià il trend, ha fatg attent la Cussegliera dals chantuns Marina Carobbio Guscetti (PS/TI). Per ch'il persunal da tgira restia er pli ditg en il mastergn, dovria meglras cundiziuns da lavur. Sche l'iniziativa vegniss approvada, dess la Confederaziun en l'avegnir avant tschertas premissas.
L'iniziativa pretenda ch'i stoppia dar avunda persunal dal fatg sin tut ils stgalims. Perquai saja necessari d'avair in dumber minimal da persunal diplomà per partiziun. La segirezza dals pazients e las pazientas stettia en relaziun directa cun la situaziun dal persunal. I dettia analisas naziunalas ed internaziunalas che mussian, ch'i dettia dapli complicaziuns sch'i n'haja betg avunda persunal qualifitgà.
Critica envers la cunterproposta
La fatschenta vegn ils 28 da november avant il pievel. Il parlament recumonda da renviar ella ed ha deliberà ina cuntraproposta indirecta. Tenor quella duai cunzunt la scolaziun dal persunal da tgira vegnir meglierada. Quai na tanscha dentant betg als iniziants e las iniziantas. Cun l'iniziativa vegniss fermà en la Constituziun federala che la Confederaziun ed ils chantuns ston promover la tgira sco impurtanta part fundamentala dal sistem da sanadad.