Siglir tar il cuntegn

Header

Navigaziun

cuntegn

Svizra Tgirar ma betg per adina

Bleras persunas che lavuran en la tgira da lunga durada na vulan betg restar activas en lur professiun fin ch'ellas van en pensiun. Quai mussa ina retschertga ch'il sindicat Unia ha laschà far cun dumandar 1'194 persunas.

In rollatur en in gang.
Legenda: La tgira da lunga durada - betg ina lavur per adina. Keystone

Bunamain la mesadad da las persunas (47 %) vulan bandunar la tgira da lunga durada avant ch'ellas han cuntanschì la vegliadetgna da pensiun. Tar ils emploiads spezialisads da sanadad eran quai perfin 52 %. Be mintga tschintgavel pensa da restar en la tgira fin a la pensiun. Quai sajan nauschas perspectivas per ina branscha che haja uschè u uschia memia pauc persunal, uschia la Unia.

Problems da sanadad e stress

La raschun principala per chalar anticipadamain èn problems da sanadad. Mintga segunda persuna vul bandunar la tgira perquai che la lavur donnegia u ruinescha sia sanadad. Plinavant han bleras da las tgirunzas (79%) era il sentiment d'esser sutpajadas.

En tut han 2'935 persunas participà a la retschertga. Ils resultats principals èn vegnids da 1'194 emploiads che lavuran en chasas da tgira e d’attempads.

RR novitads 12:00