Siglir tar il cuntegn

Svizra Ticket da 3 – PLD propona Cassis, Moret e Maudet

Quai ha decis la fracziun da la PLD il venderdi suentermezdi en sia sesida a Neuenburg. Ils 46 commembers èn sa decidids uschia per Ignazio Cassis (TI), Isabelle Moret (VD) e Pierre Maudet (GE).

Els trais.
Legenda: Els restan en trais – Ignazio Cassis (TI), Isabelle Moret (VD) e Pierre Maudet (GE). Keystone

Ina vaira elecziun

Sco la Partida Liberaldemocratica ha communitgà haja ella vulì porscher ina vaira elecziun per la successiun da Didier Burkhalter. In ticket da 3 cun candidats cun differents profils. Ignazio Casis stat, suenter 18 onns puspè, per il Tessin. Isabelle Moret represchenta sco candidata las dunnas. Pierre Maudet da sia vart stat per frestgezza giuvenila e per ils Romands.

Ils resuns dals hearings

L'emprim candidat en ils hearings da sia fracziun è stà il favurit: Ignazio Cassis (TI). Sias collegas hajan fatg diversas dumondas tar temas politics ma er tar temas persunals, ha Cassis ditg avant las medias. Perquai ch’i ha dat tantas dumondas ha sia enquista durà dapli che las trenta minutas prevesidas.

Portrait dad el.
Legenda: Ignazio Cassis (TI). Keystone
Sco en in examen...
Autur: Ignazio Cassiscandidat uffizial da la PLD

Il segund en la seria è stà il cusseglier da stadi Pierre Maudet (GE). Suenter pli che trenta minutas ha er el respundì a las medias: Ad el sajan vegnidas fatgas dumondas «fitg difficilas» e quai en franzos, englais, tudestg e talian. En pli saja el cuntent dal grond interess da la fracziun per l'economia.

Portrait Maudet.
Legenda: Pierre Maudet (GE). Keystone
Quai motivescha ...
Autur: Pierre Maudetcandidat uffizial PLD

In zic pli curt era il hearing da la terza candidata, la cussegliera naziunala Isabelle Moret (VD). Na, cun quai ch'ella enconuschia bain la fracziun na saja ella betg stada nervusa, ha ella respundì a las medias suenter avair laschà la sala da sesida.

Portrait Moret.
Legenda: Isabelle Moret (VD). Keystone
Jau hai pudì preschentar mias ideas per la Svizra.
Autur: Isabelle Moretcandidata uffiziala da la PLD

Las proximas staziuns enfin l'elecziun ils 20 da settember

Proxim punct da program per ils candidats uffizials vegnan ad esser ils hearings tar las autras fracziuns dal parlament federal. Ellas han lieu a l'emprim ed al segund mardi da la sessiun d'atun. L'elecziun effectiva en il Cussegl federal è ils 20 da settember.

Cusseglier federal Didier Burkhalter aveva annunzià ils 14 da zercladur surprendentamain da sa vulair retrar da la regenza svizra per ils 31 d'october 2017.

RR novitads 20:00