Tenor l'expert e cussegliader da finanzas Damian Gliott na saja betg recumandabel da spargnar daners a chasa, u almain betg mo a chasa. Da spargnar sin bancas saja anc adina ina da las variantas las pli segiras. Dentant dettia era dischavantatgs sch'ins spargna a lunga vista sin in conto. Ins ha bain adina la medema summa sin il conto, dentant sa diminuescha la valur dals daners pervi da l'inflaziun. Ina buna alternativa sajan las aczias, a curta vista sajan quellas dentant era adina in ristg.
Sch'ins vul spargnar a lunga vista alura èn las aczias la pli interessanta varianta.
Ina autra varianta da spargnar fiss d'investir en aur fisic, pia da cumprar aur. Quel stess'ins dentant era deponer insanua en in tresor. E tenor Damian Gliott stuess quel tresor era puspè esser tar ina banca. D'evitar bancas saja pia grev per esser propi segir.
Per mai èn ils daners ils pli segirs tar ina buna banca svizra.
Ina autra varianta saja - sch'ins haja in'ipoteca - da pajar giu quella pli spert. Sch'ins ha anc pli grondas summas ch'ins vul betg investir en aczias possian ins era cumprar in'immobiglia. Quai na saja dentant betg uschè simpel, perquai ch'ins sto savair tge immobiglias che fissan insumma rentablas ed ins sto esser bun da finanziar quellas era en avegnir.
Sch'ins vul ir a la segira, di Damian Gliott, saja la varianta classica, damai da metter sin in conto u dad investir, la meglra.