Siglir tar il cuntegn
cuntegn

Svizra Toni Brunner terminescha carriera politica

Il cusseglier naziunal songagliais ed anteriur president da la PPS, Toni Brunner vul sa retrair da la politica la fin da l'onn. Quai ha Brunner annunzià en in’intervista cun la gasetta «Schweiz am Wochenende».

Toni Brunner al pult da referir.
Legenda: Il president dal Cussegl naziunal survegnia bainprest sia brev da demissiun. Keystone

Insacura sa repetia er la politica a Berna. Sper la politica saja sia famiglia, ses bain puril e l'ustaria vegnì a la curta. En l'avegnir veglia el avair dapli temp per talas chaussas.

Durant ch'el è stà president da la Partida populara svizra èn vegnidas lantschadas l'iniziativa per il repatriament, l'iniziativa d'immigraziun da massa e l'iniziativa per l'autodeterminaziun. La PPS è er sa separada da la Partida burgais-democratica durant sia perioda d'uffizi.

Dapi il 1995 sin palc politic naziunal

Brunner è vegnì elegì il 1995 sco il pli giuven cusseglier naziunal da l’istorgia en il parlament svizzer. Da lez temp aveva el 21 onns. A partir dal 2008 è Brunner stà durant otg onns il president da la PPS. Sut sia batgetta ha la PPS realisà in resultat da record tar las elecziuns dal parlament dal 2011. Là ha la pli gronda partida da la Svizra obtegnì bunamain 30% da tut las vuschs.

RR novitads 06:00