L’emprim quartal da l’onn 2021 han las gestiunarias ed ils gestiunaris dal numer d’urgenza 145 registrà 70% dapli dumondas concernent emprovas da suicidi da giuvenils. Quai cumpareglià cun la media da la medema perioda durant ils onns 2016 fin 2020. Quai resulta dal rapport annual 2021 da Tox Info Svizra ch’è vegnì publitgà la gievgia. Sco quai che Tox Info Svizra ha communitgà, duvravan ils giuvenils en quest connex surtut «meds da dolurs simplamain disponibels or da l’apoteca sco paracetamol u ibuprofen».
Impact da corona
Sco motiv per l’augment vegn renvià en il rapport annual a la restricziun da la vita sociala che vegn engrevgiada cunzunt per giuvenils pervia da la pandemia da Covid-19. L’analisa haja dentant mussà che las dumondas na sajan betg gia s’augmentadas durant il temp da las serradas en scola e da l’emprim lockdown la primavaira 2020, mabain pir l’atun 2020.
Surtut augment online
Cun totalmain 39’584 cussegliaziuns è l’onn 2021 – tenor Tox Info Suisse – dentant stà en quest reguard in onn normal. Percunter èn il dumber da visitaders da la pagina d’internet s’augmentads l’onn 2021 per in terz cumpareglià cun avant la pandemia. 79% èn stadas tissientadas senza intenziun, cunzunt tar uffants fin tschintg onns.
Nagins uffants morts
Tox Info Suisse ha nudà l’onn 2021 en total 260 tissientadas grevas e 13 mortoris. Pertutgads da mortoris eran exclusivamain creschids. Els èn stads d’attribuir a medicaments, dentant er a drogas ed alcohol. En in cas duai esser stada ina planta problematica la raschun d’ina intoxicaziun mortala.
