Siglir tar il cuntegn

Header

cuntegn

Tractament da vaivs e vaivas La Svizra cuntrafa al scumond da discriminaziun

La Svizra cuntrafa al scumond da discriminaziun en connex cun la renta per vaivs. Quai ha decidì la gronda chombra dal Tribunal europeic dals dretgs umans a Strasbourg.

Concret vai per in vaiv dal chantun Appenzell Dadora che n’ha – suenter che la figlia pitschna è stada maiorenna – betg pli survegnì ina renta. Sin dumonda da la Svizra è il cas vegnì tractà da la chombra gronda e pia da la segunda instanza dal tribunal il zercladur 2021. En sia sentenzia ch’è vegnida publitgada mardi conferma quella la decisiun da la chombra pitschna.

La chombra gronda constatescha ch’il vaiv sa chattava en la medema situaziun per segirar sia basa d’existenza sco bleras vaivas suenter che l’uffant il pli giuven ha cuntanschì la maiorennitad. Tuttina saja el vegnì tractà autramain, uschia ch’igl è avant maun ina discriminaziun.

Il parlament svizzer è uss vid midar la lescha actuala. Uschia duai vegnir eliminà il tractament inegual da vaivas e vaivs.

RTR novitads 12:00

Artitgels legids il pli savens