L’onn passà èn ils custs per segiurns staziunars en ospitals svizzers restads stabils. Cun 18,7 milliardas francs èn ils custs restads pli u main uschè auts sco il 2017. Quai ha communitgà l’Uffizi federal da statistica la gievgia.
Er il dumber da pazients staziunars è il 2018 stà sin il nivel da l'onn avant. In milliun persunas èn stadas ospitalisadas staziunarmain en in ospital u en ina chasa da parturir. La raschun principala per ospitalisaziuns èn stadas blessuras tras accidents. Quai avant malsognas sco artritis u problems dal dies.
Dapli custs per tractaments ambulants
Ils custs per ils tractaments ambulants percunter èn creschids per 3% sin 8,1 milliardas francs. Quai saja in augment moderà cumpareglià cun ils onns avant. Il 2017 aveva l'augment muntà a 5,4% ed in onn avant schizunt 6,8%.
Creschids èn quels custs tranter auter perquai che dapli pazients laschan far tractaments be ambulant. Ultra da quai han il 2018 dapli persunas lavurà en ospitals ch'anc in onn avant.
RR novitads 12:00