Mintga lieu ha si'atgna istorgia. E cun il passà sa sviluppeschan cun il temp era tradiziuns. Tradiziuns che vegnan anc oz festivads cun grond plaschair davent da giuven fin vegl.
«Haaggeri» e «Achetringele»
En la vischnanca Samstagern en il chantun Turitg van ils umens giuvens sin via per far ina massa canera la notg da Silvester. Cun brunsinas e giaischlas vegn fatg canera durant la tradiziun «Haaggeri» per far fugir ils spierts nauschs. Uschia sappia il nov onn entschaiver cun blera fortuna. Era a Laupen en il chantun Berna datti cun il «Achetringele» ina tradiziun sumeglianta.
Fier-chaval dat cletg
A Möhlin en il chantun Argovia fa il fravi Hans Mahrer curt avant mesanotg in fier-chaval entamez la vischnanca. In dals aspectaturs survegn lura il fier-chaval che permetta a la persuna bler cletg per il nov onn. Quest usit ha cumenzà sco sgnocca avant 50 onns, ussa visitan dentant tschients persunas mintg'onn il spectacul, sco Hans Mahrer declera.
RTR actualitad 17:00