Tgi che cumpra en futur in bigliet da sgol, duai vegnir infurmà quant bler CO2 che quest sgol chaschuna. Las societads aviaticas duain inditgar las emissiuns tenor ina metoda unifitgada. Quai pretenda il Cussegl federal.
El dumonda il parlament d'acceptar ina moziun dal cusseglier naziunal, Jacques Bourgeois dal chantun Friburg. Quel pretenda dapli transparenza, per che passagiers da sgol possian decider sin basa dals fatgs e magari prender mesiras per cumpensar las emissiuns da CO2.
Gia ozendi datti divers calculaturs dad emissiuns en l'internet, dentant n'è la metodica da quintar betg adina la medema. Il Cussegl federal sa declera perquai pront dad elavurar ensemen cun ils pertutgads in princip da calculaziun scientific che las societads aviaticas avessan lura da duvrar.
RR novitads 15:00