Siglir tar il cuntegn

Header

cuntegn

Traffic aviatic L'eroport da Turitg er il 2021 cun cifras cotschnas

L'eroport da Turitg è bain sa revegnì il 2021 da sia perdita istorica dal 2020. Tuttina resta l'administratur en las cifras cotschnas. Uss porta la guerra en l'Ucraina ulteriuras malsegirezzas.

La svieuta da l'eroport è stada il 2021 cun 680 milliuns francs 9% pli aut che l'onn avant, ha communitgà l'eroport. Cumpareglià cun l'onn 2019, avant la pandemia, sa resulta dentant anc adina in minus da 46%. Quai n'è però stà nagina surpraisa: Igl era gia enconuschent che l'eroport ha gì cun be 125'000 moviments da sgols anc adina gnanc mez uschè bler traffic sco avant la pandemia.

Limità perdita cun mesiras da spargn

Cun agid da mesiras ha l'interpresa pudì limitar la perdita. Ils custs da manaschi èn sa reducids per 8%. Sco consequenza è il gudogn da manaschi cun 299 milliuns francs per in bun tant pli aut (+53%) che anc il 2020. Malgrà tuttas mesiras ed ils respargns restian dentant ils custs fix auts per mantegnair l'eroport e l'infrastructura. La finala è tuttina resultà ina perdita. Cun 10 milliuns francs è quella dentant anc en in tschert rom – cumpareglià cun ils 69 milliuns dal 2020.

Las spetgas d'analists èn vegnidas surpassadas cun quai. Quels han supponì ina perdita pli gronda. Tuttina vegn desistì da pajar or ina dividenda, sco gia il 2019 ed il 2020.

Guerra en l'Ucraina porta novas intschertezzas

Durant la pandemia è la situaziun l'ultim puspè sa meglierada. La guerra en l'Ucraina e las restricziuns che resultan pervi da quella per il traffic en l'aria han dentant puspè inquietà l'entira situaziun.

Uschia parta la plazza aviatica dal fatg che las restricziuns da viagiar pervi da la pandemia vegnian schluccadas pli e pli fitg. L'influenza da la guerra en l'Ucraina sin il traffic aviatic saja dentant anc intscherta. Sut il stritg spetgan ils manaders da gestiun per il 2022 in dumber da passagiers enturn ils 20 milliuns – pia radund dus terz dal dumber dal 2019. Il medem mument vegn er spetgà ch'i dettia puspè in gudogn.

RTR novitads 10:00

Artitgels legids il pli savens

Scrollar a sanestra Scrollar a dretga