L'iniziativa da las Alps pretenda in scumond da transportar substanzas privlusas sur il pass dal Simplon. Ils commembers e las commembras da l'organisaziun han deliberà, tar lur radunanza a Martigny unanimamain ina resoluziun per mauns dal Cussegl federal e da la regenza vallesana.
Auter che sin las rutas dal San Bernardino, dal Gottard e dal Grond San Bernard dettia sur il Simplon mintg'onn radund 11'000 transports fitg riscants da substanzas privlusas, scriva l'Iniziativa da las Alps. Il privilegi nungiustifitgà da la regenza vallesana pericliteschia l'entira regiun per lung dal Rodan fin al Lai da Genevra. Il tunnel da viafier sut la muntogna fiss pli segir.