Siglir tar il cuntegn

Header

Purtret d'in dals vaguns da Cargo sous terrain.
Legenda: Ils transports sutterrans da Cargo sous terrain duain vegnir pussibilitads. Il Cussegl federal vul stgaffir la basa legala. Keystone
cuntegn

Traffic da rauba Cussegl federal elavura lescha per «Cargo sous terrain»

Il Departament federal per traffic (UVEK) elavura ina lescha per il transport da rauba sutterran. Tar ils puncts centrals tutga che la Confederaziun na sustegna ni la construcziun ni il manaschi d'ina tala interpresa da transports. La maioritad d'aczias sto restar en mauns svizzers. Investiders da l'exteriur duain be avair ina cumpart minoritara.

Per survegnir ina lubientscha da bajegiar datti ina procedura da permiss per ils plans, che ston vegnir examinads en connex cun las consequenzas per l'ambient. I vala er il principi da betg discriminar. Ils gestiunaris ston garantir a tuts l'access per las medemas cundiziuns.

Project da milliardas

Concret vai per il project «Cargo sous terrain» lantschà d'investiders privats. Quels planiseschan in sistem da tunnels da trais vials, tranter il Lai da Genevra ed il Lai da Constanza, cun ina lunghezza da 500 kilometers. La rauba da dimensiun pli pitschna, vegniss dirigida cun computers.

Carta che mussa nudà nua ch'ils trajects giessan tras. Marcà oransch è il traject da Härkingen a Turitg che duai vegnir construì sco emprim.
Legenda: Dal Lai da Genevra fin al Lai da Constanza duai l'entir traject ir. Sco emprim vul «Cargo sous terrain» construir il traject da Härkingen-Niederbipp fin a Turitg. Keystone

La Confederaziun ha gia pliras giadas punctuà, da betg sa participar finanzialmain al project. Il Cussegl federal ha plinavant er accentuà ch'i na sa tracta betg d'ina «Lex Cargo sous terrain». Autras fatschentas da transport da rauba, duain survegnir las medemas cundiziuns. Facticamain è «Cargo sous terrain» dentant il sulet project avant maun.

L'emprima part dal tunnel che vegniss bajegiada da Härkingen-Niederbipp SO fin a Turitg (marcà oransch), vegn budgetà cun 3 milliardas francs. Il project cumplet da lai tar lai duai la finala custar 30 milliardas francs.

Ord l'archiv da SRF:

video
Consultaziun davart «Cargo sous terrain» finida
Or da Tagesschau dals 10.07.2019.
laschar ir

RTR novitads 14:00

Artitgels legids il pli savens

Scrollar a sanestra Scrollar a dretga